Hamasi tha të mërkurën se ishte i hapur për një marrëveshje armëpushimi me Izraelin, por nuk pranoi propozimin e mbështetur nga SHBA-ja të njoftuar nga Presidenti Donald Trump disa orë më parë.
Hamasi mbrojti qëndrimin e tij të mëparshëm se çdo marrëveshje duhet t’i japë fund luftës në Gaza.
Trump tha të martën se Izraeli kishte rënë dakord për kushtet e një armëpushimi 60-ditor në Gaza dhe i kërkoi Hamasit ta pranonte marrëveshjen përpara se kushtet të përkeqësoheshin.
Udhëheqësi amerikan ka rritur presionin mbi qeverinë izraelite dhe Hamasin për të ndërmjetësuar një armëpushim dhe një marrëveshje për pengjet, si dhe për t’i dhënë fund luftës.
Trump tha se periudha 60-ditore do të përdoret për të punuar drejt përfundimit të luftës, diçka që Izraeli thotë se nuk do ta pranojë derisa Hamasi të mposhtet. Ai tha se një marrëveshje mund të arrihet që javën e ardhshme.
Zyrtari i Hamasit, Taher al-Nunu, tha se grupi militant ishte “i gatshëm dhe serioz në lidhje me arritjen e një marrëveshjeje”.
Ai tha se Hamasi ishte “i gatshëm të pranonte çdo iniciativë që çon qartë në përfundimin e plotë të luftës”.
Një delegacion i Hamasit pritet të takohet me ndërmjetësuesit egjiptianë dhe ata të Katarit në Kajro të mërkurën për të diskutuar propozimin, sipas një zyrtari egjiptian.
