Një fluturim i zakonshëm nga Shanghai drejt Tokios u kthye në një makth në lartësinë 10 mijë metë, kur një avion i kompanisë “Japan Airlines” humbi papritur lartësinë dhe ra me shpejtësi 7600 metra në më pak se 10 minuta.
Në bord ndodheshin 191 pasagjerë, të cilët përjetuan çaste paniku. Një defekt i sistemit të presionit brenda kabinës detyroi pilotin të zbresë menjëherë në lartësinë e sigurt prej 3200 metrash dhe të devijojë fluturimin drejt aeroportit Kansai në Osaka, ku avioni u ul me urgjencë.
Sipas raportimeve të “People” dhe “Viral Press”, situata brenda kabinës ishte kaotike. Maskat e oksigjenit ranë automatikisht, pasagjerët filluan të bërtisnin, të qanin, e madje të shkruanin mesazhe lamtumire për të dashurit e tyre. Disa ndanë kode bankare dhe detaje sigurimesh, të bindur se nuk do t’ia dilnin.
Një pasagjere tregoi se një nga stjuardesat shpërtheu në lot ndërsa u bërtiste të gjithëve të vendosnin maskat: “Ajo bërtiti se avioni kishte një defekt serioz. Ishim të gjithë të bindur se do të përfundonte keq,” tha ajo.
Në video që tashmë po qarkullojnë gjerësisht në rrjete sociale, shihen fytyra të ngrira nga frika, maska oksigjeni nëpër fytyra, dhe një heshtje e rëndë që flet më shumë se çdo britmë.
Fatmirësisht, avioni u ul në mënyrë të sigurt dhe askush nuk mbeti i lënduar. Por, për pasagjerët, ajo përvojë mbetet një traumë e vërtetë në lartësinë e fluturimit. Hetimet janë në vijim për të zbardhur saktësisht çfarë ndodhi me sistemin e presionit të avionit.
Ky nuk ishte një turbulencë e zakonshme — ishte një rënie e lirë që i detyroi pasagjerët të përballen me frikën më të madhe: fundin e jetës së tyre, në ajër.
