Këtë vajzë të re, e gjejmë në dyert e spitalit Onkoligjik. Jeton në Gjermani, por i është dashur të kthehet në Shqipëri, pasi fatkeqësisht të dy prindërit, janë diagnostifikuar me tumor.
“Është realisht shumë e vështirë dhe diçka që s’di si të marr përgjigje”,- thotë ajo.
Nëna është me tumor në gji, në fazën paraprake të sëmundjes, ende në konsulta me mjekët. Po qëndron pas saj për të mos e përballuar e vetme një nga sëmundjet që peshën kryesore të saj ndër të tjera, e ka edhe në qetësinë psikologjike.
Vështirësi po has me kurimin e babait, i cili prej 1 viti, është diagnostifikuar me limfomë kutane, një formë e rrallë e tumorit që shfaqet kryesisht në lëkurë në qelizat e gjakut të quajtura limfocite.
“Problemi që unë kam është se te hematologjia duke qenë se babi im është pacientë i DLBCL, që është limfom kutane, dhe për momentin po merr një kimioterapi që quhet CHOP. Por njëkohësisht duhet të marr edhe ilaçin Polatuzumab, i cili mungon. Babi e ka filluar kimioterapinë që në prill. Seancën e parë e ka marrë Polatuzumab. Ky ilaç mungon që prej prillit, ndërkohë jemi në qershor. Ky ilaç është jetik, pa këtë ilaç nuk mund të shërohet plotësisht. Babi Im po bën sot seancën e katërt dhe është hera e tretë që ilaçi mungon”,- thotë e reja.
Vajza, e cila nuk dëshiron të identifikohet me emër përsakohë prindërit e saj duhet të gjejnë ende zgjidhje dyerve të spitalit e nga frika se nuk do të marrin më shërbim, denoncon se ilaçi “Polatuzumab”, mungon prej të paktën 3 muajsh, jetik për terapinë e kombinuar: kimioterapi-medikamente, duke rrezikuar që trajtimi të ketë efekt.
E dëshpëruar nga pafuqia për të ndihmuar prindërit e saj në një realitet që nuk e ka në dorë, vajza na tregon se është përpjekur ta sigurojë ilaçin e domosdoshëm për trajtimin e tumorit të babait, edhe privatisht.
Por përballë kostos marramendëse, është dorëzuar.
“Kemi pyetur, sa kushton dhe se sa është mundësia që në ta sigurojmë vet këtë ilaç. Na kanë thënë që vetëm një dozë kushton nga 5 mijë deri në 7 mijë euro. Babit tim i duhen 6 doza, që i bie afro 30 mijë euro nëse do e siguronim vet këtë ilaç”,- shprehet më tej.
E reja thotë se mjekët kanë sugjeruar që Polatuzumabi të shtyhet për seancën e shtatë ose të tetë. Por kjo shoqërohet me frikën e madhe se sëmundja mund të përparojë dhe të mos reagojë më ndaj trajtimit.
“Mjekët na kanë thënë se patjetër është shumë i rëndësishëm. Patjetër duhet të merret brenda këtyre 6 seancave. Duke qenë që mungon tani, këtë medikament babi im do e marr më pas në seancën e 7 apo 8. Mjekët thonë se kanë folur me institucionet përkatëse edhe u kanë thënë se është ne mungesë. Kemi frikë se sëmundja merr një tjetër drejtim edhe ti nuk e trajton dot më, kësaj i frikësohemi.”
Report Tv kërkoi një reagim zyrtar nga Ministria e Shëndetësisë, por deri në publikimin e kësaj kronike nuk kishte asnjë përgjigje./reporttv
