Të paktën 26 persona të akuzuar për bashkëpunim me Izraelin janë arrestuar në Khuzestan, në Iranin jugperëndimor, dy ditë pasi një armëpushim i dha fund një lufte 12-ditore midis dy armiqve të përbetuar, raportoi një media iraniane të mërkurën në mbrëmje.
Sipas agjencisë gjysmëzyrtare të lajmeve FARS, individët u identifikuan si agjentë dhe pjesëmarrës të pavetëdijshëm në luftën e fundit të imponuar nga regjimi sionist në Iran dhe u arrestuan nga shërbimi i inteligjencës së Gardës Revolucionare, një degë elitare e forcave të armatosura të Republikës Islamike.
Shumica e tyre rrëfyen veprimet e tyre, duke përfshirë aktivitete kundër sigurisë, përhapjen e trazirave publike dhe akte sabotimi”, shtoi agjencia, duke cituar një deklaratë nga shërbimi i inteligjencës së Gardës.
Arrestimet u njoftuan pasi Shefi i Shtabit të Izraelit, Gjenerallejtënant Eyal Zamir, konfirmoi se anëtarët e forcave speciale të ushtrisë kishin vepruar në Iran gjatë luftës.
“Forcat tona vepruan fshehurazi në zemër të territorit armik”, tha ai.
Autoritetet e Republikës Islamike shpesh njoftojnë arrestimet dhe ekzekutimet e agjentëve të dyshuar të shërbimeve të inteligjencës së huaj, veçanërisht Izraelit.
Gjyqësori iranian tha të dielën se do të përshpejtojë gjyqet në raste të kësaj natyre, pas sulmit të paprecedentë të nisur nga Izraeli më 13 qershor, i cili me sa duket u bazua, në shumë raste, në informacione jashtëzakonisht të sakta.
Provinca Khuzestan, e cila kufizohet me Irakun, është rajoni me depozitat më të mëdha të naftës në Iran dhe ka pësuar shumë bombardime nga ushtria izraelite kundër “objektivave ushtarake”.
