Lideri Suprem i Iranit, Ali Khamenei, ka reaguar pas sulmit të forcave iraniane ndaj një baze ushtarake amerikane në Katar mbrëmjen e 23 qershorit.
“Nuk kemi shkelur të drejtat e askujt. Dhe nuk do të lejojmë kurrë që dikush të shkelë të drejtat tona. Nuk do të dorëzohemi përballë askujt. Kjo është logjika e kombit iranian,” shkroi Khamenei në një postim në platformën X.
Pentagoni ka konfirmuar se baza amerikane në Doha është sulmuar me raketa nga Irani, por theksoi se të gjitha raketat janë rrëzuar dhe nuk ka pasur viktima.
Autoritetet iraniane njoftuan se numri i raketave të lëshuara nga Irani ishte i barabartë me numrin e bombave që SHBA hodhi një ditë më parë mbi objektiva bërthamore iraniane.
Sulmi është dënuar ashpër nga disa vende të rajonit, përfshirë Arabinë Saudite, Egjiptin, Jordaninë, Bahrejnin dhe Omanin. Ndërkohë, Katari ka deklaruar se situata e sigurisë mbetet e qëndrueshme dhe nuk ka vend për panik.
