Sot është thuajse e pamundur të gjesh dikë që nuk ka një celular. Këto pajisje janë bërë pjesë e pandashme e jetës sonë: nuk shërbejnë më vetëm për të telefonuar, por edhe si kalendarë, axhenda, radio, lojëra dhe shumë më tepër. Nuk e lëmë pas as kur dalim nga shtëpia, madje e marrim edhe në tualet.
Por, pavarësisht dobisë së madhe që kanë, vendosja e celularëve në disa vende të caktuara mund të paraqesë rreziqe për shëndetin. Studime të shumta kanë treguar se rrezatimi nga celularët lidhet me probleme serioze, përfshirë kancerin e trurit, tumoret dhe çrregullimet riprodhuese.
Edhe pse nuk mund t’i shmangim plotësisht, mund të bëjmë disa ndryshime për të mbrojtur shëndetin tonë. Ja disa prej vendeve ku nuk rekomandohet të mbahet celulari:
1. Nën jastëk ose në shtrat
Të flesh pranë telefonit nuk është ide e mirë. Njoftimet që vijnë gjatë natës dhe drita blu nga ekrani ndikojnë në cilësinë e gjumit duke ulur prodhimin e melatoninës, hormonit të pushimit. Për më tepër, fushat elektromagnetike mund të shkaktojnë dhimbje koke, ndërsa mbulimi i telefonit me batanije rrit temperaturën e pajisjes, çka ka çuar në raste shpërthimesh në botë.
2. Në xhep
Mbajtja e telefonit në xhep është një veprim shumë i zakonshëm, por jo i padëmshëm. Rrezatimi i tij, kur është pranë trupit, është më i lartë. Studimet tregojnë se kjo mund të ndikojë në strukturën e ADN-së, fertilitetin dhe shëndetin e kockave, veçanërisht në zonën e legenit.
3. Në banjo
Celularët që merren në tualet për të dëgjuar muzikë ose për të kaluar kohën janë të ekspozuar ndaj mikrobeve. Bakteret që qëndrojnë në ajër pas përdorimit të tualetit kapen lehtësisht në sipërfaqet e pajisjes, duke u përhapur më pas në duar, fytyrë apo veshje.
4. Në temperatura ekstreme
Përballja me nxehtësi apo të ftohtë të fortë dëmton komponentët elektronikë të celularit. Ndryshimet e temperaturës mund të shkaktojnë zgjerim dhe tkurrje të pjesëve të brendshme, duke ndikuar në funksionimin e tij.
5. Në karikim për shumë orë
Lënia e telefonit të karikohet gjatë gjithë natës nuk është rrezik për shëndetin, por ndikon negativisht në baterinë e pajisjes, duke ulur jetëgjatësinë dhe performancën e saj. Për më tepër, kjo sjell konsum më të lartë energjie dhe rritje të faturave.
Në përfundim, nuk ka nevojë të heqim dorë nga celularët, por të mësojmë si t’i përdorim me më shumë kujdes.
