Presidenti i SHBA-së Donald Trump njoftoi se SHBA ka goditur tre centrale bërthamore në Iran, duke përfshirë Fordon, Natanzin dhe Esfahanin.
“Ne kemi përfunduar sulmin tonë shumë të suksesshëm në tre centralet bërthamore në Iran, duke përfshirë Fordow, Natanz dhe Esfahan. Të gjithë aeroplanët tani janë jashtë hapësirës ajrore të Iranit”, shkroi ai në Truth Social.
Bombarduesit B-2 ishin të përfshirë në sulmet ajrore amerikane ndaj Iranit, tha një zyrtar amerikan, sipas agjencisë së lajmeve Reuters.
Pas sulmeve, Trump mbajti një fjalim para kombit.
“Ky është një moment historik për Shtetet e Bashkuara të Amerikës, Izraelin dhe botën”, tha Trump në Truth Social.
Ai shtoi se “Irani tani duhet të bjerë dakord për t’i dhënë fund kësaj lufte”.
Irani “tani duhet të bëjë paqe”, tha Presidenti i SHBA-së, Donald Trump.
“Nëse nuk e bëjnë këtë, sulmet e ardhshme do të jenë shumë më të mëdha”.
“Të gjithë i kanë dëgjuar këto emra për vite me radhë, ndërsa ata ndërtonin këtë ndërmarrje të tmerrshme shkatërruese.”
“Sonte mund t’i raportoj botës se sulmet ishin një sukses spektakolar ushtarak.”
“Do të ketë ose paqe, ose një tragjedi për Iranin shumë më e madhe se ajo që kemi parë gjatë tetë ditëve të fundit”, paralajmëroi Trump.
“Mbani mend, kanë mbetur shumë objektiva. Sonte ishte më e vështira nga të gjitha deri më tani, dhe ndoshta më vdekjeprurësja.”
“Por nëse paqja nuk vjen shpejt, ne do të shkojmë në ato objektiva të tjera me precizion, shpejtësi dhe aftësi”, thotë presidenti i SHBA-së.
Irani nga ana tjetër pranoi bombardimin në Fordo.
Morteza Heydari, zëdhënës i Menaxhimit të Krizave të Provincës Qom, tha se “një pjesë e zonës së centralit bërthamor Fordo u sulmua nga ajri”, sipas agjencisë së lajmeve Tasnim.
Fordo – vendi sekret bërthamor iranian
I vendosur rreth 96 km në jug të kryeqytetit Teheran, vendi i pasurimit të uraniumit në Fordo ndodhet në një rajon malor pranë qytetit të Komit.
Mendohet se objekti nëntokësor përbëhet nga dy tunele kryesore që përmbajnë centrifuga të përdorura për pasurimin e uraniumit, si dhe një rrjet tunelesh më të vegjël.
Përpara sulmit të së dielës nga SHBA-të, siç u njoftua nga Presidenti Trump, Izraeli i kishte bërë thirrje Uashingtonit për ndërhyrje, pasi SHBA-të janë e vetmja ushtri me aftësinë për ta goditur atë.
