Lidhja me internetin në Iran është pothuajse tërësisht e bllokuar, sipas të dhënave të NetBlocks dhe kompanisë Cloudflare, të cilat monitorojnë gjendjen e rrjeteve globale.
Trafiku i internetit në vend ka rënë me mbi 95% që nga data 17 qershor, duke shkaktuar ndërprerje të thella në komunikim për miliona qytetarë. Mediat ndërkombëtare si CNN raportojnë se regjimi iranian ka kufizuar qasjen në platformat kryesore si WhatsApp, Instagram, Google Play dhe App Store, ndërsa qytetarëve u është kërkuar madje të fshijnë aplikacione të caktuara nga telefonat e tyre.
Autoritetet iraniane e arsyetojnë këtë veprim si një masë parandaluese kundër një sulmi të mundshëm kibernetik nga Izraeli, megjithëse ende nuk ka prova të qarta që e konfirmojnë këtë. Nga ana tjetër, disa kompani si SpaceX përmes Starlink kanë rifilluar përpjekjet për të ofruar akses të kufizuar satelitor në disa zona të Iranit, për të ndihmuar qytetarët të anashkalojnë kufizimet shtetërore.
Nuk përjashtohet mundësia që ndërprerja të jetë pjesë e një strategjie të brendshme të kontrollit të informacionit, në një kohë të tensionuar politikisht dhe gjeostrategjikisht për vendin.
