Autoritetet austriake do të lejojnë monitorimin e shërbimeve të mesazheve të enkriptuara si WhatsApp dhe Telegram, si pjesë e masave për të luftuar kërcënimet terroriste.
Ministri i Brendshëm, Gerhard Karner, njoftoi të martën se qeveria e drejtuar nga konservatorët në Vjenë ka rënë dakord për këtë iniciativë, e cila ende kërkon miratim nga parlamenti.
“Sistemi i mbikëqyrjes përmes softuerëve të posaçëm do të nisë së zbatuari në vitin 2027 dhe do të jetë i kufizuar në raste të veçanta, sipas kritereve shumë të rrepta,” deklaroi Karner.
Mbikëqyrja do të mund të miratohet vetëm me vendim të një gjykate të përbërë nga tre gjyqtarë, mbi bazën e provave të qarta. Fillimisht, numri i rasteve do të jetë i kufizuar në 30 në vit, dhe çdo zgjerim do të kërkojë miratim të mëtejshëm parlamentar. Sipas ministrit, kjo përfaqëson një hap të rëndësishëm në përpjekjet për të parandaluar terrorizmin.
Nga ana tjetër, partia liberale NEOS u shpreh se kjo masë nuk përbën rrezik për mbikëqyrje masive, për shkak të kushteve të forta ligjore që e rregullojnë atë.
Austria po ndjek shembullin e vendeve të tjera të Bashkimit Evropian si Gjermania dhe Franca, të cilat kanë vendosur monitorim të shërbimeve të ngjashme në raste të dyshimeve konkrete për aktivitete terroriste.
Këto masa vijnë një vit pas alarmit për një sulm të mundshëm terrorist në Vjenë, përpara koncerteve të këngëtares amerikane Taylor Swift. Të dyshuarit në atë rast u identifikuan dhe arrestuan vetëm falë bashkëpunimit me shërbimet e inteligjencës së huaja.
