Teksa ndodhet në burg që prej 10 Shkurtit kur u arrestua me urdhër të SPAK, Erion Veliaj duket se i ka humbur shpresat për të dalë nga burgu, ku mundësia e vetme tashmë duket se i ka mbetur vetëm rekursi në Gjykatën e Lartë, ku është caktuar relatore Albana Boksi.
Analisti Enton Abilekaj i ftuar në emisionin “Të Paekspozuarit” u shpreh se grupimet brenda PS-së kanë kapur institucionet, ku theksoi se Edi Rama ka kapur SPAK-un dhe BKH-në. Ai shtoi më tej se grupi i Veliajt ka ndikim në Gjykatën e Lartë të drejtuar nga Sokol Sadushi.
Sa i përket mesazheve të koduara që Erion Veliaj po publikon në TikTok, Abilekaj tha se përmbajtja e tyre është e kundërta me përmbajtjen servile ndaj Edi Ramës në Facebook dhe sipas tij, ka një luftë që po zien.
Enton Abilekaj: Po të llogarisësh lidhjet që kanë brenda PS-së ndikimet që kanë grupimet te Gjykata e Lartë, Veliaj mund të favorizohet. SPAK-un në përgjithësi e mori Rama, pra BKH-në, ndërsa Gjykatën e Lartë ka influencë grupi i Veliajt. Ne kemi një kryetar të Gjykatës së Lartë që kryen një aktivitet për paligjshëm ndaj Gjykatës Kushtetuese sot. Veprimtaria e Veliajt në TikTok dhe në Facebook dhe Instagram janë të ndryshme. Ai është marrë me personazhe konkrete dhe përmbajtja e tyre është e kundërta me përmbajtjen servile ndaj Ramës në Facebook. Ka një luftë që zien, por nuk e dimë me fakte dhe kjo luftë po vepron tani, kur është ky vendim kritik për Veliajn. Do të merret vendim nëse del apo do të rrijë shumë gjatë në burg dhe nëse del a do ta marrë bashkinë e Tiranës.
