Prokuroria kërkon një dënim me burg deri në shtatë vjet e katër muaj dhe heqje të të drejtave politike për kryetarin e ndaluar të bashkisë së Stambollit, Ekrem Imamoglu, në lidhje me deklaratat që ai bëri kundër kreut të Prokurorisë së Përgjithshme të Stambollit. Imamoglu, i cili mbahet në burgun Silivri, në perëndim të Stambollit, doli sot para gjykatës me akuzat për shënjestrimin e kryeprokurorit të Prokurorisë së Përgjithshme të Stambollit, Akin Gurlek.
“Jam këtu, në këtë burg të nëndheshëm, sepse fitova Stambollin tri herë kundër këtij mentaliteti. Jam këtu sepse ushtruam qeverisje lokale pro-popullore për 16 milionë njerëz. Jam këtu sepse isha mbrojtësi i Stambollit. Jam këtu sepse, për herë të parë në historinë botërore, u zgjodha si kandidat presidencial me 15.5 milionë vota në zgjedhjet paraprake”, tha Imamoglu.
“A po na gjykojnë? Nuk po na gjykojnë, po na ndëshkojnë drejtpërdrejt”, shtoi ai.
Ai mbërriti në sallën e gjyqit nën duartrokitje dhe brohoritje, ndërsa në sallë ishin, ndër të tjerë, kryetari i Partisë Republikane Popullore (CHP), Ozgur Ozel, dhe bashkëshortja e tij Dilek Imamoglu. Pasi lexoi mocionin e prokurorisë, gjykata vendosi të vazhdojë gjyqin më 16 korrik. Hetimi kundër Ekrem Imamoglu në këtë rast u urdhërua më 20 janar për deklaratat që ai bëri në një intervistë televizive në lidhje me Kryeprokurorin e Stambollit Akin Gurlek dhe familjen e tij.
43-vjeçari Gurlek, fillimisht si gjyqtar dhe më pas si prokuror, luajti një rol të rëndësishëm në gjyqe të mëdha që përfshinin ndjekje penale të figurave të opozitës, përfshirë dënimin e bashkëkryetarit të Partisë së Drejtësisë Popullore (HDP) pro-kurde, Selahattin Demirtas, dhe ndjekjet penale të Imamohlu dhe kryetarëve të bashkive të CHP në komunat rajonale të Stambollit. Ai më parë kishte shërbyer si zëvendësministër i drejtësisë.
Një hetim prokurorial për deklarata të veçanta kundër prokurorit Akin Gurlek u nis gjithashtu muajin e kaluar kundër kryetarit të saj, Ozgür Ozel, me akuzat për “kërcënim të një oficeri gjyqësor me qëllim pengimin e kryerjes së detyrave të tij” dhe “fyerje publike të një zyrtari publik”. Në një tubim të CHP-së në lagjen Gaziosmanpasa të Stambollit më 4 qershor, udhëheqësi i opozitës kryesore bëri deklarata të ashpra kundër Kryeprokurorit të Stambollit Akin Gurlek në lidhje me arrestimin e pesë kryetarëve të bashkive të CHP-së, si pjesë e zgjerimit të aktakuzës në çështjen kryesore të korrupsionit kundër kryetarit të burgosur të Stambollit Ekrem Imamoglu.
