Kryetarja e Gjykatës Kushtetuese, Holta Zaçaj ditën e sotme kishte një përgjigje për kryeministrin Edi Rama i cili i bëri thirrje dy ditë më parë që institucioni që drejton të mos lajthisë për të pranuar kërkesën e Unionit që gjyqtarëve t’u rritet paga me 700 Euro. Dje, Gjykata Kushtetuese e cilësoi të papranueshëm ndërhyrjen. Sot tha se nuk ndjehen nën presion, se janë mësuar me deklarata të tilla që vijnë nga të gjitha palët dhe se media i jep më shumë vëmendje.
“Janë deklarata të zakonshme që ne i kemi parë nga të gjitha palët që përfshihen në proces, përfshi edhe median, dua ta theksoj dhe konsideroj. Sepse ndonjëherë jeni ju të medias që i jepni zë më shumë se çfarë duhet ndonjëherë mendimeve, opinioneve që jepen për vendimet tona. Megjithatë për sa kohë vjen në kuadër të lirisë së medias dhe të shprehjes, kjo është një vlerë e shtuar, pasi unë jam një partizane vetë, por edhe trupa. Kështu që atë që ne çmuam të rëndësishme, detyrimin ndaj publikut, për ta informuar dhe garantuar për funksionin tonë të pavarur dhe të paanshëm, ne e kryem. Pjesa tjetër mbetet për mënyrën se secili nga pushtetet mendon të veprojë dhe e sheh detyrën e tij, por për ne kjo është pjesa më e rëndësishme” tha ajo.
