Kryeministri Edi Rama ka folur për herë të parë për ngjarjen e rëndë kriminale që tronditi pasditen e djeshme Kryeqendrën e veriut dhe mbarë opinionin publik në Shqipëri, ku humbën jetën tre persona dhe një tjetër po lufton me jetën në spital.
I ftuar në emisionin “Opinion”, kryeministri tha se referuar shifrave, krimi nën qeverisjen e tij është zmbrapsur me shumë se kurrë ndonjëherë.
“Me krimin po ndodh që është më i zmbrapsur se kurrë ndonjëherë në historinë e këtij vendi. Patjetër që këto janë tragjedi, nuk diskutohet, por ne e kemi marrë detyrën me mesatarisht me 115 vrasje në vit, një vrasje në tre ditë dhe sot jemi në numrin më të ulët të vrasjeve që vjen duke u ulur progresivisht.
Këto padiskutim janë tragjedi… Krimi është më i tkurrur se kurrë ndonjëherë. Nuk ka përfunduar kjo betejë, është një betejë që vazhdon. Çdo vit numri i vrasjeve është në rënie dhe ky vit është më numrin më të ulët të vrasjeve qysh se unë kam marrë detyrën”, u shpreh Edi Rama.
I pyetur nga gazetari Blendi Fevziu për informacionet dhe të dhënat e dala nga aplikacionet e komunikimeve sekrete, ku ka një ndërthurje mes politikës, shtetit dhe krimit, kryeministri tha se ato i takojnë drejtësisë t’i zbardhë.
“Kjo historia e EnchroChat dhe Sky Ecc është një histori që u takon organeve ligjzbatuese që ta hetojnë. Aty ka me mijëra mesazhe që ça nuk thonë e ça nuk tregojnë, si “takova atë të gjatin”, duke marrë në shembull veten time, edhe përse nuk ka dalë por nuk çuditem sikur të dali…
Vrasjet kriminale janë më pak, se unë vrasje llogaris dhe ato në familje, por këto kriminale janë më pak se ato që kanë qenë më përpara. Ne sot jemi në një pikë kthese me luftën kundër krimit të organizuar”, përmbylli Edi Rama.
