Një konflikt për një vend parkimi përfundoi me dhunë mbrëmjen e djeshme në Ksamil, ku një 54-vjeçar mbeti i lënduar dhe një turist turk përfundoi në pranga.
Policia e Sarandës ka arrestuar shtetasin turk Hasan Dembiras, 26 vjeç, lindur në Turqi dhe me banim në Kosovë, pasi dyshohet se është autori që ka goditur 54-vjeçarin shqiptar Adriatik Mollanji gjatë një konflikti të dhunshëm që ndodhi mbrëmjen e së enjtes.
Ngjarja ndodhi si pasojë e një debati të çastit për parkimin, ku një grup shtetasish turq u përfshinë në konflikt verbal dhe fizik me Mollanjin. Gjatë përplasjes, 54-vjeçari është shtyrë dhe ka rënë në tokë, duke pësuar dëmtime në pjesën e pasme të kokës.
I lënduari u transportua menjëherë në Spitalin Rajonal të Sarandës, ku mori ndihmën e nevojshme mjekësore. Burime zyrtare konfirmojnë se ai ndodhet jashtë rrezikut për jetën.
Pas ngjarjes, policia shoqëroi në Komisariat grupin e të rinjve turq të përfshirë në incident. Pas hetimeve paraprake, u arrestua Hasan Dembiras si personi që dyshohet se kreu aktin e dhunës.
Materialet procedurale i kaluan Prokurorisë së Rrethit Gjyqësor Sarandë, ndërsa hetimet për zbardhjen e plotë të rrethanave të ngjarjes vijojnë.
