Teherani ka kritikuar ndalimin e udhëtimit nga SHBA-ja për iranianët dhe qytetarët e 11 vendeve të tjera, kryesisht të Lindjes së Mesme dhe Afrikës, duke thënë se vendimi i Uashingtonit ishte një shenjë e një “mentaliteti racist”.
Presidenti amerikan, Donald Trump ka nënshkruar pak ditë më parë një urdhër ekzekutiv duke ringjallur kufizime gjithëpërfshirëse në ndalimin e udhëtimit të presidentit të SHBA-së për mandatin e parë, i justifikuar për arsye sigurie kombëtare pas një sulmi me bombë zjarri në një tubim pro-Izrael në Kolorado.
Alireza Hashemi-Raja, drejtori i përgjithshëm i ministrisë së Jashtme për çështjet e iranianëve jashtë vendit, e quajti masën, e cila hyn në fuqi më 9 qershor, “një shenjë e qartë e dominimit të një mentaliteti supremacist dhe racist midis politikëbërësve amerikanë”.
Vendimi “tregon armiqësinë e thellë të vendimmarrësve amerikanë ndaj popullit iranian dhe musliman”, shtoi ai në një deklaratë të lëshuar nga ministria.
Përveç Iranit, ndalimi i SHBA-së synon shtetasit e Afganistanit, Mianmarit, Çadit, Kongos-Brazavilit, Guinesë Ekuatoriale, Eritresë, Haitit, Libisë, Somalisë, Sudanit dhe Jemenit. Një ndalim i pjesshëm u vendos për udhëtarët nga shtatë vende të tjera.
Hashemi-Raja tha se politika “shkel parimet themelore të së drejtës ndërkombëtare” dhe i privon “qindra miliona njerëz nga e drejta për të udhëtuar vetëm në bazë të kombësisë ose fesë së tyre”.
Irani dhe SHBA-të i ndërprenë marrëdhëniet diplomatike menjëherë pas Revolucionit Islamik të vitit 1979 dhe që atëherë marrëdhëniet kanë mbetur thellësisht të tendosura.
SHBA-të janë shtëpia e komunitetit më të madh iranian jashtë Iranit. Sipas shifrave nga ministria e jashtme e Teheranit, në vitin 2020 kishte rreth 1.5 milion iranianë në SHBA.
