Zbardhen detaje të reja nga ngjarja e rëndë që ndodhi në Bulqizë ku një 35-vjeçar u gjet i gjallë dy ditë pas aksidentit që pësoi. Isa Nurçe ishte larguar nga banesa dhe nuk kishte dhënë më asnjë shenjë jete.
Familjarët e kishin denoncuar zhdukjen e tij në polici, duke ngritur alarmin për fatin e të riut. Por kthesa e papritur ndodhi mesditën e së premtes, kur disa fëmijë që po laheshin në zonën e Zallit, pranë urës së Çeranecit në aksin Bulqizë–Peshkopi, vunë re një automjet të përmbysur pranë shtratit të lumit dhe njoftuan menjëherë banorët e zonës.
35-vjeçari është gjetur i gjallë në rrethana të pabesueshme, brenda automjetit të tij të aksidentuar. Në vendngjarje mbërritën forcat e policisë dhe shërbimi i urgjencës. Brenda mjetit u gjet i bllokuar por ende gjallë 35-vjeçari, i cili dyshohet se ka humbur kontrollin e makinës dy ditë më parë dhe ka përfunduar në shtratin e lumit. Mjeti ishte pothuajse i padukshëm nga rruga.
I riu u nxor me ndihmën e banorëve dhe u transportua menjëherë në spitalin e Traumës për ndihmë mjekësore. Gjendja e tij shëndetësore nuk është bërë ende publike, por mësohet se ai ishte në gjendje të vetëdijshme në momentin e shpëtimit.
