Komisioni Qendror i Zgjedhjeve ka nevojë për 10 ditë kohë për të përgatitur infrastrukturën dhe stafin e nevojshëm para se të nisë rinumërimin e 1282 kutive të votimit të qarkut Tiranë pas miratimit të kërkesës së Partisë Demokratike një ditë më parë.
Janë 450 mijë fletë votimi që do të numërohen nga fillimi dhe vendi ku do të realizohet ky proces nuk është vendosur por duket se ambientet më të përshtatshme janë ato të parkut olimpik Feti Borova ku u realizua numërimi i votave të diasporës.
Sipas kërkesës së Partisë Demokratike në Tiranë do të numërohen votat e partive së bashku me votat e pavlefshme pasi demokratët ende shpresojnë se mund t’i marrin mandatin e 14 partisë Mundësia.
Nga ana tjetër do të rinumërohen edhe votat e kandidatëve pasi Ilir Alimehmeti, Asllan Dogjani, Lisandër Hoxha e Mimoza Hadarmataj pretendojnë se procesi ka pasur parregullsi.
Por ky proces rinumërimi do të përfshijë edhe votën e kandidatëve të PS pasi PD këmbëngul që verifikimi të jetë i plotë pasi sipas opozitës çdo parregullsi që mund të gjendet i shërben kërkesës së saj për pavlefshmëri të zgjedhjeve në qarkun e Tiranës.
Ndryshe nga Tirana, në Dibër PD do të rinumërojë vetëm votat e kandidatëve të saj për shkak të pretendimeve të kandidatit Xhemal Gjunkshi se ka pasur parregullsi.
Rinumërimi i 44 kutive të Dibrës do të zhvillohet të mërkurën dhe do të kryhet në ambientet e komisionit qendror të zgjedhjeve.
Mbetet për tu parë çfarë do të vendosë komisioni i ankimimeve dhe sanksioneve për Durrësin për të cilin gjithashtu PD ka kërkuar rinumërim të votave për partinë dhe kandidatin.
