Ylli i Barcelonës, Lamine Yamal, po bën histori si ikona argjentinase Lionel Messi.
Sensacioni 17-vjeçar pritet të jetë titullar për Spanjën kundër Francës në gjysmëfinalet e UEFA Nations League, me të dyja skuadrat që luftojnë për një vend në finale kundër Portugalisë në Mynih.
Ishte viti i kaluar kur Yamal tërhoqi vëmendjen e botës, duke luajtur një rol kryesor në Kampionatin Europian të vitit 2024, ku Spanja mposhti Anglinë në finale për të fituar trofeun.
Goli i tij mahnitës në gjysmëfinale kundër Francës u shpall si “Goli i Turneut”, dhe ai u kurorëzua si lojtari më i mirë i ri i kampionatit.
Yamal e ka vazhduar formën e jashtëzakonshme edhe këtë sezon me Barcelonën, duke shënuar 18 gola dhe regjistruar 25 asistime, ndërsa katalanasit fituan tripletën vendase.
Forma e tij e pabesueshme për Barcelonën në këtë moshë ka çuar në krahasime me Lionel Messin, i cili fitoi tetë “Topa të Artë”, katër Liga të Kampionëve dhe dhjetë La Liga gjatë kohës së tij në Spanjë.
Edhe pse është ende herët për ta krahasuar Yamal drejtpërdrejt me njërin prej më të mëdhenjve të të gjitha kohërave, paraqitjet e tij kanë tërhequr vëmendjen e botës së futbollit.
A është Yamal “Messi i ri”?
Drejtori sportiv i Barcelonës, Deco, foli për “BBC Match of the Day” për Lamine Yamal, ku bëri një krahasim të drejtpërdrejtë mes Yamal dhe Messit.
Dhe ka të bëjë me mënyrën se si ai po i bën tifozët të mendojnë kur blejnë bileta për ndeshjet.
“Lamine është Lamine. Leo është Leo. Leo ishte lojtari më i mirë në historinë e këtij klubi dhe për mua, lojtari më i mirë në histori”, tha Deco.
“Pra, nuk është e lehtë të krahasosh këto gjëra, por Lamine, në aspektin e cilësisë, në të njëjtën mënyrë mund të bëjë histori si Leo.
“Lamine është një lojtar ndryshe që bën të gjithë të çmenden kur e shohin duke luajtur futboll, këto lloj lojtarësh që të bëjnë të paguash për të shkuar në stadium për ta parë.
Ai është i veçantë. Ai është ndryshe dhe këtë e kemi ditur që kur erdhi tek ne para dy vitesh.
Por kurrë nuk e di si do të reagojë një lojtar në këtë moshë në nivelin më të lartë, dhe ai e tregoi se ishte i pabesueshëm në Europian, kur fitoi me kombëtaren e tij.
Por këtë sezon ai dha diçka më shumë me ne, sepse tregoi sa i mirë është në ndeshjet më të mëdha, sa i qetë është, sa i pjekur është. Pra, është ndryshe.
Nuk është normale për një 17-vjeçar, por ne jemi me fat që e kemi Laminën me ne. Ishte e pabesueshme”.
