Një ngjarje tronditëse ka ndodhur në juglindje të Sulawesit në Indonezi, ku një krokodil i madh ka sulmuar për vdekje një djalë 17-vjeçar, ndërsa ky ndodhej duke peshkuar me mikun e tij në lumin Kaleleha.
La Bayu, viktima, u sulmua dhe u tërhoq brutalisht nga krokodili, i cili më pas e mbajti trupin e pajetë në nofullat e tij. Pamje të frikshme të filmuara nga ekipet e shpëtimit tregojnë momentin kur krokodili e tërheq trupin e djalit nëpër lumë.
Miku i tij, Inguu, u hodh menjëherë në lumë për ta shpëtuar, por grabitqari e goditi me forcë dhe vazhdoi ta rrotullojë trupin e La Bayut në atë që njihet si “rrotullimi i vdekjes”.
Rreth orës 20:00 të mbrëmjes, pas njoftimit të banorëve lokalë, ekipi i shpëtimit arriti në vendngjarje. Mbi 100 persona morën pjesë në kërkimet për trupin. Sipas autoriteteve, krokodili u gjet rreth 50 metra nga një urë, ende me trupin e adoleshentit në gojë.
Përdorimi i rrjetave ndihmoi në kapjen e kafshës dhe nxjerrjen e trupit të La Bayut, i cili kishte plagë të rënda në sqetull, një krah të thyer, dorën e majtë të shqyer dhe dëmtime të rënda në pjesën e belit. Trupi i është dorëzuar familjes së tij.
Zëdhënësi i policisë së Muna-s, Ipda Baharuddin, i bëri thirrje banorëve të jenë të kujdesshëm dhe të shmangin përkohësisht aktivitetet në këtë zonë.
Kjo tragjedi është vetëm një nga shumë që kanë ndodhur në Indonezi, e cila renditet si vendi me më shumë sulme të krokodilëve në botë. Sipas të dhënave të Unionit Ndërkombëtar për Ruajtjen e Natyrës (IUCN), mbi 1,000 incidente janë regjistruar gjatë dekadës së fundit, me më shumë se 450 viktima – ndërsa mendohet se shumë raste mbeten të paregjistruara.
Ngjarja e rëndë vjen pak pas një tjetër rasti të tmerrshëm, ku një 13-vjeçar, Muhammad Syahputra Almanda, u sulmua për vdekje nga një krokodil 13 metra i gjatë, ndërsa po luante futboll me shokët në provincën Jambi.
Po ashtu, muajin e kaluar një grua shtatzënë 28-vjeçare, Munirah, u sulmua nga një krokodil në kuzhinën e shtëpisë së saj të përmbytur në Kalimantan. Edhe pse motra e saj u përpoq ta shpëtonte, grabitqari e tërhoqi atë në ujë. Trupi i saj u gjet pas gjysmë ore, duke notuar në sipërfaqen e lumit Mambulu.
Shkencëtarët paralajmërojnë se zhvillimi urban dhe shpyllëzimi kanë reduktuar habitatet natyrore të krokodilëve, duke i afruar gjithnjë e më shumë pranë zonave të banuara nga njerëzit. Kombinimi i faktorëve si peshkimi i tepruar, humbja e habitateve dhe varfëria që shtyn banorët të lahen apo peshkojnë në lumenj, kanë shtuar ndjeshëm rrezikun e sulmeve fatale.
