Policia e Shtetit vijon me sukses operacionin e koduar “Fake Star 5”, i cili ka rezultuar në lokalizimin dhe kapjen e dy shtetasve të shpallur në kërkim, të dyshuar për përfshirje në një rrjet kriminal të kontrabandimit dhe falsifikimit të veshjeve.
Njëri prej të ndaluarve është shtetasi turk O.S., 46 vjeç, i cili dyshohet se koordinonte procesin e stampimit me logo false të markave të njohura ndërkombëtare. Tjetri është L.H., 21 vjeç, bashkadministrator i njërës prej magazinave ku kryhej ky aktivitet kriminal në fshatin Brrar.
Ky operacion vijon pas arrestimit dje të 4 personave dhe procedimit në gjendje të lirë të 4 të tjerëve, në kuadër të të njëjtës hetim.
Njoftimi:
Vijon operacioni policor i koduar “Fake Star 5”.
Lokalizohen dhe kapen të 2 shtetasit e shpallur në kërkim.
Njëri prej tyre, shtetas turk që koordinonte procesin e stampimit me logo false të veshjeve të kontrabanduara.
I ndaluari tjetër, bashkadministrator i njërës prej magazinave ku kryhej procesi.
Dje, gjatë operacionit, u vunë në pranga 4 shtetas dhe u proceduan në gjendje të lirë 4 të tjerë.
Si rezultat i kontrolleve të kryera me mbështetjen e inteligjencës policore, në vijim të operacionit “Fake Star 5”, Sektori për Hetimin e Krimit Ekonomik dhe Financiar, në bashkëpunim me komisariatet e Policisë Nr. 3 dhe Nr. 4, lokalizuan, kapën dhe vunë në pranga shtetasin turk O. S., 46 vjeç, si dhe shtetasin L. H., 21 vjeç.
Ata ishin shpallur në kërkim në kuadër të operacionit “Fake Star 5”, sepse dyshohet se janë përfshirë në veprimtaritë kriminale të magazinimit në 2 ambiente në fshatin Brrar, të veshjeve të kontrabanduara, të cilave iu stampoheshin logo false të markave të njohura ndërkombëtare.
Materialet procedurale iu referuan Prokurorisë së Tiranës, për veprime të mëtejshme.
