Zhvendosja sezonale e të rinjve nga Tirana drejt jugut për punësim gjatë verës po krijon vështirësi për sektorin e shërbimeve në kryeqytet.
Në vetëm dy muajt e fundit, agjencitë e punësimit kanë regjistruar rreth 300 vende të lira për kamarierë dhe banakierë në Tiranë. Kjo mungesë e fuqisë punëtore lidhet drejtpërdrejt me shpërnguljen drejt zonave bregdetare, ku kërkesa për punëtorë sezonale është rritur ndjeshëm.
“Gjatë verës, kur pjesa më e madhe e jetës zhvendoset në bregdet, jo vetëm që lokalet në Tiranë përballen me rënie të klientelës, por edhe bizneset në bregdet po hasin vështirësi për të gjetur staf të qëndrueshëm dhe po mbështeten te punëtorët nga jashtë,” shpjegon ekspertja e punësimit, Flora Xhamani Baba.
Ajo thekson se pagat më të larta në jug, që në disa raste arrijnë deri në 1.200 euro për pozicione si kamarier, së bashku me mungesën e kontratave formale, janë faktorë që i nxisin të rinjtë të braktisin vendet e punës në kryeqytet.
“Ka raste kur punonjësit e lënë punën në mes të sezonit, ose sepse nuk ia dalin, ose sepse gjejnë një pagë pak më të lartë diku tjetër, ndonjëherë për një diferencë minimale si 10 mijë lekë të rinj. E gjitha kjo ndodh për shkak të një tregu pune të paorganizuar,” shton ekspertja.
Tirana numëron rreth 67 njësi bar dhe restorant për çdo 10 mijë banorë, një ndër raportet më të larta në Europë. Ky fakt e bën edhe më sfidues sigurimin e stafit gjatë muajve të verës.
