Ka reaguar në një postim në platformën X, Kryetari i Grupit Parlamentarë të PD, Gazment Bardhi në lidhje me ngjarjen e ndodhur në Shkodër ku mbetën viktima disa persona.
Bardhi u shpreh se, Policia e Shtetit është jashtë funksionit, në shërbim të Ramës dhe kjo po sjell cënim të sigurisë publike me pasoja të rënda si ngjarja e sotme në Shkodër.
“Në Shkodër, në mes të qytetit, ndodh një atentat mafioz me disa të vrarë dhe disa të plagosur, ngjarje që nëse Policia do ishte e fokusuar në punën e saj mund dhe duhet të ishte parandaluar.
Ndërkohë, Policia e Shtetit është e zënë me përndjekjen politike të çdo kundërshtari të Edi Ramës, deri në absurditetin e “arrestimit” edhe të makinave.
Është një akt kriminal nxjerrja e Policisë së Shtetit jashtë funksioni! Kjo sjell cënim të sigurisë publike dhe akte të rënda si kjo e sotmja. Policia e Shtetit që supozohet të luftojë krimin, është shndërruar në mbrojtëse e krimit dhe në vegël në dorën e tij për të goditur opozitën!”, shkruan Bardhi.
