Aktori i humorit, Akil Varfi ka rrëfyer një epsiod të errët nga e shkuara e tij, ku si shumica e familjeve shqiptare morën rrugët për në emigracion me qëllim sigurimin e një jete më të mirë.
I ftuar në emisionin “S’e luan topi”, Akili rrrëfen se ishte ai shtysa për të shkuar në Gjermani të gjithë së bashku dhe se kushtet e vështira në kamp, e bënin të ndihej fajtor për nismën që kishte marrë.
Ai tregon se në moshën 21-vjeçare u nis përsëri drejt Gjermanisë, por kësaj radhe vetëm. Për Akilin, momenti më i vështirë ishte kur autoritetet e arrestuan pasi kishte thyer lejen e qëndrimit dhe se ka qëndruar pas hekurave për 3 muaj.
“Mua më patën futur për piano dhe duke u rritur po shtohej nevoja, në ato kushte që ishim po vështirësohej. Nuk po e ndihmoja familjen aq sa duhej dhe nuk doja të ktheheshim në atë gjendje të vështirësive ekonomike. Mora para borxh dhe në moshën 16-vjeçare ika për tre ditë. Në tre ditë bëmë edhe pasaportat e familjarëve dhe ikëm. Përfunduam në një kamp në Gjermani, kushtet ishin të tmerrshme, vidhja edhe bukë në kamp.
Ishte shumë e vështirë. Atje kishim një racion të mirë në ditë, por ishte një. Unë kam pas një çantë krahu dhe atje kishte sportele ku merrej buka, shkoja tek njëri merrja bukën dhe shkoja tek tjetri për të marrë sa më shumë bukë. Sa e shihja që largoheshin shkoja merrja bukën e fusja në çantë. Thoja ku dreqin e solla familjen. Nuk flija, kisha frikë. Ndjehesha shumë fajtor, kisha motrat mamin dhe babin aty.
Ata më kanë besuar dhe besojnë ende sot. Kjo zgjati për një muaj dhe më pas jeta jonë ndryshoi. U largova sërish drejt Gjermanisë, vetëm në moshën 21-vjeçare. Ndenja tre muaj pas hekurave. Më kapi policia sepse nuk isha kthyer brenda tre muajsh në Shqipëri, më kanë mbajtur po aq muaj brenda.
Vështirësia kanë qenë vetëm katër ditët e para sepse më izoluan brenda një dhome të errët me një dritare shumë të vogël. Për katër ditë babi im nuk e ka ditur nëse jam gjallë apo jo. Babai po më kërkonte, atje më rrinte truri. Më pas gjej një adresë, i kërkoj, dhe i shkruaj në Facebook, babit”, tha Akili.
