Një situatë e pazakontë ka ndodhur mbrëmjen e djeshme në fshatin Hardhishtë të Shijakut, ku është raportuar për djegie të qëllimshme të mbeturinave. Flakët kanë nisur papritur dhe janë përhapur me shpejtësi, ndërsa tymi i dendur ka mbuluar të gjithë zonën përreth.
Banorët shprehen të shqetësuar për shkak të tymit të rëndë, i cili po u rrezikon seriozisht shëndetin dhe po i ekspozon ndaj rrezikut të asfiksimit. Megjithëse ngjarja është raportuar pranë autoriteteve, deri tani nuk ka pasur asnjë ndërhyrje nga policia apo shërbimi zjarrfikës.
Kjo nuk është hera e parë që ndodh një situatë e tillë. Mbeturinat grumbullohen në mënyrë të përsëritur në këtë zonë dhe më pas digjen, duke shkaktuar ndotje të rëndë dhe pasoja për komunitetin.
Ky incident vjen pas investigimeve të emisionit “Piranjat”, ku është denoncuar me prova konkrete mungesa e infrastrukturës për menaxhimin dhe asgjësimin e mbeturinave në bashkinë e Shijakut. Djegia e mbeturinave në mënyrë të paligjshme duket se është kthyer në një praktikë të përsëritur dhe të rrezikshme.
