Këshilli i qytetit të Barcelonës votoi për të ndërprerë marrëdhëniet e tij institucionale me qeverinë izraelite dhe marrëveshjen e miqësisë me qytetin e Tel Avivit, “derisa të rivendoset respekti për të drejtën ndërkombëtare dhe të drejtat themelore të popullit palestinez”.
Vendimi u miratua nga këshilli i qytetit me mbështetjen e Partisë Socialiste në pushtet dhe partive të majta radikale dhe pro-pavarësisë.
Teksti i miratuar nga këshilli i qytetit të Barcelonës përmban rreth 20 pika, duke përfshirë ndërprerjen e marrëdhënieve institucionale me “qeverinë aktuale të Izraelit”.
Ai gjithashtu pezullon “marrëveshjen e miqësisë” të 24 shtatorit 1998, midis kryeqytetit katalanas dhe Tel Aviv-Yafo, “derisa të rivendoset respekti për të drejtën ndërkombëtare dhe të drejtën ndërkombëtare humanitare dhe të garantohen të drejtat themelore të popullit palestinez”.
“Niveli i vuajtjeve dhe vdekjeve që Gaza ka përjetuar gjatë një viti e gjysmë të kaluar, si dhe sulmet e përsëritura nga qeveria izraelite në javët e fundit, e bëjnë çdo marrëdhënie midis dy qyteteve “të paqëndrueshme”, tha kryebashkiaku socialist i Barcelonës, Jaume Colboni.
Ndër masat e tjera, disa prej të cilave bien jashtë juridiksionit të komunës, është një kërkesë drejtuar bordit të Ekspozitës së Barcelonës që të mos presë pavione të qeverisë izraelite ose “kompani armësh ose ndonjë sektor tjetër që përfiton nga gjenocidi, pushtimi, aparteidi kundër popullit palestinez dhe vendbanimet” e territoreve palestineze.
Një rekomandim i ngjashëm po shqyrtohet për portin e Barcelonës, në mënyrë që të mos pranojë anije të përfshira në transferimin e armëve në Izrael.
Kjo nuk është hera e parë që Barcelona ka pezulluar marrëdhëniet me qeverinë e Benjamin Netanyahut. Në shkurt të vitit 2023, ish-kryetarja e bashkisë, aktivistja Ada Colau vendosi të “pezullojë përkohësisht” marrëdhëniet e saj me Izraelin, si dhe marrëveshjet e binjakëzimit me komunën e Tel Avivit.
Ky vendim, i cili ishte kritikuar, u pezullua disa muaj më vonë kur Colboni fitoi zgjedhjet komunale.
Qeveria spanjolle e socialistit, Pedro Sánchez njohu shtetin e Palestinës më 28 maj 2024, së bashku me Irlandën dhe Norvegjinë. Në muajt e fundit, Madridi është bërë një nga zërat më kritikë brenda Bashkimit Evropian kundër qeverisë Netanyahu.
