Diplomacia ruse ka shfrytëzuar dje një tjetër rast për të ironizuar presidentin francez Emmanuel Macron, pas publikimit të videos virale ku shihet se gruaja e tij, Brigitte Macron, duket se e godet lehtë në fytyrë gjatë mbërritjes së tyre në Vietnam.
Zëdhënësja e Ministrisë së Jashtme të Rusisë, Maria Zakharova, komentoi ngjarjen me ironi:
“Ajo që është me të vërtetë interesante nuk është vetë videoja, por si do ta justifikojë këtë skenë këtë herë Pallati Élysée”, u shpreh ajo.
Më tej, Zakharova shtoi me sarkazëm:
“Çfarë versioni do të ofrohet tani? Ndoshta Zonja e Parë donte ta përkëdhelte me butësi bashkëshortin, por llogariti gabim forcën e saj? Apo ndoshta i dha një shami dhe ai nuk arriti ta kapë?”
Në një postim në Telegram, ajo vazhdoi talljen me një koment ironik: “Propozimi im: ndoshta ishte dora e Kremlinit.”
Videoja e publikuar, e realizuar në aeroportin e Hanoit, tregon momentin kur dera e avionit presidencial francez hapet dhe Macron shfaqet në hyrje, ndërsa dora e Brigitte Macron ngrihet drejt fytyrës së tij. Pamjet janë interpretuar nga disa media si një shuplakë, ndonëse konteksti mbetet i paqartë.
Presidenti Macron ka mohuar spekulimet për ndonjë përplasje mes çiftit, duke deklaruar se bëhej fjalë për një moment humori mes tyre dhe ka kërkuar që “të gjithë të qetësohen” lidhur me interpretimet që po qarkullojnë.
Ndërkohë, në Rusi, videoja është transmetuar disa herë në mediat shtetërore, sipas agjencisë AFP.
