Prokuroria pranë Gjykatës së Shkallës së Parë të Juridiksionit të Përgjithshëm Elbasan ka nisur zyrtarisht hetimet për ngjarjen e rëndë të ndodhur në qytetin e Gramshit, ku rreth 70 fëmijë të një kopshti publik dyshohet se janë helmuar, të prekur nga bakteri salmonela.
Sipas njoftimit të Policisë, specialistët për Hetimin e Krimit në Komisariatin e Gramshit kanë referuar materialet procedurale në Prokurori për vlerësim, pas marrjes së informacioneve nga rrjetet sociale më datë 24 maj, ku raportoheshin raste të shumta helmimi në Kopshtin Nr.1 të qytetit.
Gjendja më e rënduar shëndetësore është regjistruar tek 6 fëmijë, të cilët janë shtruar në spitalin e Gramshit për marrjen e ndihmës mjekësore. Ndërkohë, janë kryer analizat për të gjithë fëmijët e kopshtit si dhe për personelin.
Autoritetet hetimore kanë sekuestruar kartelat klinike të 6 fëmijëve të shtruar, procesverbalet e furnizimit dhe kontrollit të produkteve ushqimore në institucionin parashkollor, si dhe kanë marrë mostra nga ushqimi për analiza të mëtejshme laboratorike. Është bllokuar gjithashtu çdo produkt ushqimor i mbetur në kuzhinën e kopshtit, në pritje të rezultateve të analizave.
Të gjitha veprimet procedurale janë kryer nën drejtimin e Prokurorisë së Elbasanit, ndërkohë që hetimet vijojnë për të përcaktuar shkakun e saktë të helmimit dhe për të identifikuar përgjegjësit e mundshëm.
Ngjarja ka shkaktuar shqetësim të thellë tek prindërit dhe komuniteti lokal, ndërsa institucionet kanë premtuar zbardhjen e plotë të rastit dhe marrjen e masave të nevojshme për parandalimin e rasteve të tilla në të ardhmen.
