Hismet Smakaj, një 65-vjeçar me origjinë nga Shkodra që prej vitesh jeton në Londër, është kthyer në hero pasi shpëtoi një vajzë 7-vjeçare nga mbytja në lumin Tamiz, në lindje të qytetit.
Ngjarja ndodhi pasditen e së shtunës, më 17 maj, teksa Hismeti dhe bashkëshortja e tij po ktheheshin nga një shëtitje. Ata vërejtën vajzën pranë kangjellave metalike të lumit. Në një moment, vajza hoqi duart nga kangjellat dhe u hodh në ujin e ftohtë dhe të rrëmbyeshëm.
Pa humbur kohë, Hismeti zhveshi rrobat, bëri disa hapa prapa dhe u hodh në lumë. Ai notoi rreth pesë metra deri sa arriti ta kapte vajzën, e cila po merrej nga rrjedha, dhe e nxori në breg duke u mbajtur fort pas murit.
Brenda pak minutash, në vendngjarje u mblodhën shumë kalimtarë dhe shërbimet e emergjencës, përfshirë policinë, që ndihmuan në përfundimin me sukses të shpëtimit.
“Kam fëmijë dhe nipër e mbesa. Kur pashë vajzën, e dija që duhej të veproja menjëherë,” tha Hismeti pasi doli nga uji.
Vajza, që mësohet se është në spektrin e autizmit, u mor menjëherë në kujdes nga infermierët, të cilët i dhanë ndihmën e nevojshme.
Mediat britanike e kanë cilësuar Hismetin si një hero të vërtetë për guximin dhe humanizmin që tregoi në atë moment vendimtar.
