I prekur dhe me lot në sy, drejtori i përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, bëri thirrje të fuqishme Izraelit për të treguar mëshirë në luftën në Gaza dhe të ndalojë.
Duke folur gjatë Asamblesë së Përgjithshme vjetore të OBSH-së, Tedros theksoi se konflikti po shkakton vuajtje të mëdha dhe po e dëmton edhe vetë Izraelin.
“Ju mund të imagjinoni se si njerëzit po vuajnë. Është vërtet e gabuar të përdorësh ushqimin si armë. Është shumë e gabuar të përdorësh furnizime mjekësore si armë“, – u shpreh ai, duke denoncuar kushtet çnjerëzore në të cilat ndodhen njerëzit në Rripin e Gazës.
Kreu i OBSH-së theksoi se vetëm një zgjidhje politike mund të sjellë paqe të qëndrueshme dhe të qëllimshme në rajon.
Në të njëjtën kohë, Kombet e Bashkuara njoftuan se kanë filluar shpërndarjen e ndihmave humanitare në Gaza, me rreth 90 kamionë që kanë kaluar kufirin, duke synuar të zbusin krizën e rëndë që po përjetojnë civilët palestinezë.
