Partia Socialiste e Shqipërisë është në prag të sigurimit të mandatit të saj të katërt radhazi në qeverisje, teksa rezultatet paraprake të zgjedhjeve parlamentare tregojnë për një fitore të thellë.
Sipas të dhënave më të fundit të publikuara nga Komisioni Qendror i Zgjedhjeve në orën 07:10, janë numëruar 4 907 nga 5 225 qendrat e votimit në mbarë vendin. Deri tani, Partia Socialiste kryeson me 52,13% të votave, çka i siguron 82 mandate në Kuvend, mjaftueshëm për të formuar shumicën e vetme qeverisëse.
Në vend të dytë renditet koalicioni opozitar PD – Aleanca për Shqipërinë Madhështore, me 34,45% të votave, që përkthehen në rreth 52 mandate.
Ndërkohë, disa prej partive të vogla kanë arritur ose po i afrohen pragut të përfaqësimit në Kuvend:
- Koalicioni Nisma Shqipëria Bëhet (NISMA-SHB) – 3,50%
- Partia Socialdemokrate (PSD) – 3,47%
- Partia Mundësia (MUNDËSIA) – 2,95%
Partitë e tjera, përfshirë Lëvizjen Bashkë, KEA, AKSH, ADR dhe të tjera të vogla, nuk kanë arritur të kalojnë pragun prej 2%, dhe sipas projeksioneve aktuale, nuk pritet të përfaqësohen në Kuvend.
Me përfundimin e numërimit që po afrohet, pritet që rezultati final të vulosë një mandat të katërt për Partinë Socialiste në drejtimin e vendit.
