Procesi zyrtar i votimit në zgjedhjet parlamentare 2025 ka përfunduar në orën 19:00 në të gjithë vendin. Menjëherë pas mbylljes së qendrave të votimit, Komisioni Qendror i Zgjedhjeve (KQZ) ka dalë më deklaratë mbi pjesëmarrjen e qytetarëve në votime.
Sipas kryekomisionerit Ilirjan Celibashi, pjesëmarrja në rang kombëtar deri në orën 19:00 ka qenë 41.37%, sipas të dhënave të grumbulluara nga qendrat e votimit në orën e fundit të procesit.
“Jemi duke mbikëqyrur procesin e dorëzimit të kutive të votimit dhe materialeve zgjedhore. 41.37% pjesëmarrja, kjo është mes orës 18:00 dhe orës 19:00. Për pak minuta do të ketë një update, nuk mendoj se do të ketë një ndryshim të madh. Në vlerësimin tonë procesi ka shkuar në përputhje me të gjitha rregullat dhe standardet,” deklaroi Celibashi.
Celibashi i bëri thirrje partive politike që të tregojnë qetësi dhe vetëpërmbajtje. Sa i takon rezultatit paraprak, Celibashi u shpreh se do publikohet pasdite e të martës.
“Ajo çfarë të gjithë do të duhet të kemi në vëmendje është qetësia që duhet tu krijojnë partitë dhe udhëheqësit politike numëruesve dhe anëtarëve të komisionit. Është e këshillueshme që deklarimet për rezultatet që vijnë pas vlerësimit të fletëve të votimit paraprakisht nga përfaqësuesit politike janë pa asnjë vlerë dhe janë pa kontribute pozitive.
Votat janë në kutitë e votimit dhe duhet të presim me durim numërimin dhe vlerësimin e votave. Është një proces i vështirë. Është me rëndësi që të ketë qetësi dhe vetëpërmbajtje nga të gjitha palët për këtë proces.
Rezultatin paraprak do të kemi jo më vonë se pasditja e të martës. KQZ nuk do toleroje asnjë rast apo iniciative që shkon kundër integritetit të numërimit”, tha Celibashi.
