Cristiano Ronaldo dhe partnerja e tij Georgina Rodriguez po përgatiten për një pushim luksoz në Ibiza, ku do të relaksohen në jahtin e tyre privat. Për këtë udhëtim, çifti ka vendosur të angazhojë një kuzhiniere private, duke ofruar për shërbimin e saj një pagesë marramendëse. Për vetëm një javë pune do të paguhet më shumë se një milion euro.
Kuzhinierja e zgjedhur është Marta Garcia Bou, një influencuese e njohur në rrjetet sociale me emrin Boukie. Ajo është bërë e famshme përmes videove ku prezanton aftësitë e saj të veçanta në kuzhinë. Sipas vetë Martës, ishte Georgina ajo që e kontaktoi direkt përmes Instagramit, duke e ftuar të jetë kuzhinierja personale në jaht. Marta do të përgatisë ushqime ekskluzive për Ronaldon dhe Georginën, në çdo moment të ditës apo natës.
“Nëse duan biftek në orën dy të mëngjesit, do të zgjohem në atë orë dhe do t’ua përgatis. Do të jetë sfiduese, sidomos sepse do të udhëtojnë me gjithë familjen, përfshirë edhe fëmijët e vegjël, që mund të kenë dëshirat më të çuditshme. Do të jetë një spektakël”-u shpreh Marta.
Marta ka rreth gjysmë milioni ndjekës në TikTok dhe afro 400 mijë në Instagram, duke u bërë një nga emrat më të njohur në fushën e gastronomisë në rrjet. Falë këtij ndikimi, ajo ka fituar besimin e shumë figurave publike, përfshirë këngëtarin e famshëm spanjoll Quevedo.
