Presidenti serb, Aleksandër Vuçiç, është në një vizitë në Shtetet e Bashkuara, ku kërkon të sigurojë mbështetje nga Donald Trump për të vizituar Moskën më 9 maj, në kuadër të përkujtimeve për Ditën e Fitores ndaj Nazizmit. Megjithatë, një çështje tjetër që Vuçiç po kërkon të marrë miratimin e SHBA-ve është statusi i Kosovës.
Gjatë një konference për shtyp, Vuçiç theksoi se nuk mund të ketë standarde të dyfishta në trajtimin e drejtësisë ndërkombëtare, duke shtuar se Karta e Kombeve të Bashkuara duhet të zbatohet në mënyrë të barabartë, jo vetëm për Ukrainën, por edhe për Serbinë.
“Nuk mund të keni një qasje të dyfishtë, të thoni se jeni në favor të respektimit të së drejtës publike ndërkombëtare dhe Kartës së OKB-së, dhe pastaj të bombardoni Serbinë, të pushtoni 13 ose 14 përqind të territorit të Serbisë. Dhe kur diçka e ngjashme ndodh në Ukrainë, atëherë është një krim.
Nuk mund të vazhdosh të thuash në Sarajevë se Kosova është e pavarur dhe pastaj të thuash se Dodiku është kriminel, që dëshiron diçka tjetër…”, theksoi Vuçiç për gazetarët.
Ai kujtoi një bisedë me Rudi Giuliani-n, ish-bashkëpunëtor i Trump, ku i kishte shprehur shqetësimin se nuk mund të mbrohet e drejta ndërkombëtare dhe Karta e OKB-së në një rast, dhe më pas të ndodhin veprime të tilla si bombardimi i Serbisë dhe pushtimi i pjesëve të saj territoriale.
Vuçiç gjithashtu e kritikooi qëndrimin e dyfishtë të ndërkombëtarëve, duke përmendur Sarajevën dhe deklaratat për pavarësinë e Kosovës, ndërkohë që shtoi se disa politikanë, si Dodik, janë cilësuar si kriminelë, kur ata kërkojnë ndihmën e Serbisë.
