Nga data e sotme, 1 maj, kontrollet në pikat doganore që lidhin Shqipërinë me Kosovën janë hequr. Marrëveshja që lehtëson procedurat kufitare për automjetet me targa të dy shteteve është aktivizuar sërish, duke mundësuar lëvizje më të shpejtë dhe pa pengesa.
Sipas kësaj marrëveshjeje, qytetarët e Shqipërisë dhe Kosovës do të kalojnë nëpër pikat kufitare të Morinës dhe Vërmicës me procedura të shpejtuara gjatë 9 muajve të vitit dhe në fundjavat e festave.
Përvoja e vitit të kaluar ka treguar efikasitetin e këtij procesi, pasi ka shmangur bllokimet dhe ka lehtësuar kalimin e kufirit gjatë sezonit veror.
Ky lehtësim është i domosdoshëm për shkak të fluksit të madh të udhëtarëve nga Kosova, të cilët udhëtojnë për në Shqipëri, kryesisht për pushimet verore.
Këtë vit, procedurat e thjeshtësuara do të zbatohet nga 1 maji deri më 30 shtator dhe nga 1 nëntori deri më 28 shkurt të vitit pasardhës. Gjatë kësaj periudhe, nuk do të ketë kontrolle pasaportash apo kartash identiteti për qytetarët e të dy vendeve.
