Kryetari i Partisë Demokratike, Sali Berisha, prezantoi në Pukë programin katërvjeçar të PD-së për Shqipërinë, duke vënë theksin tek përmirësimi i standardit të jetesës. Ai premtoi një minimum jetik prej 200 eurosh për pensionistët dhe të papunët, pagë minimale prej 500 eurosh dhe mesatare prej 1200 eurosh.
Berisha theksoi se buxheti i shtetit ka kapacitetin për rritjen e pagave dhe pensioneve, nëse ndalet korrupsioni.
“Beteja e 11 majit është më epikja që është zhvilluar ndonjëherë mes njerëzve të lirë dhe hajdutëve. Paratë ekzistojnë, por vidhen. Nuk do të zhduken më 130 milionë euro si me djegësin e Tiranës. Përgjegjës është vetëm ai që i firmos Edi Rama,” deklaroi ai.
Sa i përket sektorit të shëndetësisë, Berisha premtoi rimbursimin e të njëjtave barna që përdoren në Itali.
“Brenda javës së parë, do të mbyllen farmacitë Doshi dhe Nushi. Në vend nuk do të lejohen ilaçe që nuk janë të certifikuara në të paktën dy vende të BE-së,” tha ai.
Lidhur me premtimin e kryeministrit Edi Rama për anëtarësimin e Shqipërisë në BE deri në vitin 2030, Berisha u shpreh skeptik: “Pasaporta evropiane e Ramës është si djegësi i Tiranës dhe si premtimi për shëndetësi falas, një mashtrim.”
Nga Puka, ai i bëri apel qytetarëve të mos mbështesin partitë e reja dhe subjektin e drejtuar nga Tom Doshi, duke i cilësuar si “paterica të Edi Ramës”. “E patë në Lezhë? Dy kandidatë të Doshit u tërhoqën, me urdhër të Ramës, përmes ndërhyrjes së Ulsiut dhe kërcënimeve në SPAK. Doshi u bind dhe i tërhoqi,” tha ai.
Në përmbyllje, Berisha theksoi se vota për partitë e tjera opozitare i shërben Partisë Socialiste dhe Edi Ramës.
