Kreu i Partisë Demokratike, Sali Berisha, ka deklaruar se një nga prioritetet kryesore të qeverisjes së tij do të jetë mbështetja e nënës shqiptare dhe familjes tradicionale. Gjatë një daljeje publike, Berisha theksoi se çdo fëmijë do të subvencionohet nga shteti – i pari me 70%, i dyti me 60%, dhe i treti me 100%, deri në moshën 23-vjeçare. Ai akuzoi ashpër kryeministrin Edi Rama për, siç e quajti ai, “propagandë kundër familjes shqiptare” dhe përdorim të gjuhës së papërshtatshme në publik.
Ai nuk kurseu ironinë ndaj kryeministrit, duke e cilësuar si “i pafytyrë” për mburrjen publike me videot nudo, të cilat, sipas Berishës, përfaqësojnë një shëmti morale dhe një propagandë të turpshme kundër vlerave familjare.
Sali Berisha: Nëna shqiptare, vigane, të ketë mbështetjen më të fuqishme që të rrisë fëmijët. Do subvencionojmë çdo fëmijë, të parin me 70, të dytin me 60, të tretin 100% nga shteti deri në 23 vjeç.
Ne si komb të gjithë madhështinë e kemi të nënat. Prandaj ata që duan të zhdukin kombin, duan të zhdukin nënën shqiptare. Prandaj Rama si njeri pa vlera, sillet nga një takim në një tjetër me një fjalor të padenjë. Një burrec 2 metër i gjatë, njëherë thotë se burrat janë kështu e ashtu, duke harruar se ata janë baballarët e fëmijëve të atyre zonjave, janë partnerët e atyre zonjave. Turp more, që të flasësh ashtu. I pafytyrë, me një gjuhe të tillë flet. Me një propagandë të dënueshme, u thotë kontrolloni në ‘google’ videot e mia nudo, mburret me to.
Këto nuk janë rastësi, këto janë botëkuptimi i atyre që vërshuan kundër familjes dhe vlerave të saj. I atyre që thanë se ka ikur kohë të quajmë nënën nënë dhe babën babë. I atyre që solli në Kuvend ligjin për fermat e nënat. Por Edi Rama këto nuk do të kalojnë kurrë te Shqipëria dhe shqiptarët. Ti me atë gjendjen tënde mund të bësh ç’të duash, por me familjen shqiptare mos luaj. Larg duart nga propagandë e turpshme, asnjë votë nuk do të marrësh ti me këto që bën.
