Një shtetas shqiptar është shpallur fajtor në Angli për trafikim dhe shfrytëzim seksual të grave, kryesisht braziliane. Roland Cankaj, 43 vjeç, u arrestua në prill të këtij viti dhe pas një gjyqi gjashtë ditor, u dënua për disa vepra penale të lidhura me drejtimin e një rrjeti të organizuar kriminal.
Ky grup, i quajtur “Cankaj Brotherhood”, kishte si qëllim trafikimin e grave në Mbretërinë e Bashkuar për prostitucion. Hetimet për rrjetin nisën në vitin 2022 dhe zbuluan se Cankaj përdorte dokumente të falsifikuara për të marrë me qira apartamente ku shfrytëzoheshin viktimat.
Gjatë operacionit të policisë, u zbuluan se Cankaj shoqëronte viktimat në adresa të ndryshme, ku ato detyroheshin të ofronin shërbime seksuale. Njëra nga viktimat tregoi se ai e kishte rekrutuar në Brazil, duke e mashtruar me premtime për fitime të mëdha, dhe pasi mbërriti në Angli, ajo detyrohej të kryente marrëdhënie seksuale me deri në 15 burra në ditë, duke ndarë të ardhurat me Cankajn. Gjithashtu, policia gjeti dëshmi të fotove provokuese që përdoreshin për të reklamuar shërbimet e grave në bordellot që ai drejtonte.
