Siguria ushqimore në Shqipëri vihet sërish në pikëpyetje! Një sasi sheqeri palmë e kontaminuar me nivel të lartë të dioksidit të squfurit, një alergen i rrezikshëm kur tejkalohet kufiri i lejuar, është shitur në tregun shqiptar.
Alarmi është dhënë nga sistemi evropian RASFF (Sistemi i Njoftimit të Shpejtë për Ushqimet), më 10 prill 2025.
Produktit, i identifikuar si “Palmsugar slices TD bg 200g”, ka origjinën nga Tajlanda dhe është importuar në vendin tonë nga Holanda. Megjithatë, ende nuk është bërë e ditur se cila kompani ka qenë përgjegjëse për shpërndarjen në tregun shqiptar.
Sipas të dhënave të Autoritetit Kombëtar të Ushqimit (AKU), në Shqipëri kanë hyrë gjithsej 24 kilogramë të këtij produkti dhe e gjithë sasia është shitur.
“Pas marrjes së njoftimit nga sistemi RASFF më datë 10.04.2025, AKU kreu verifikime në terren. U konstatua se produkti me origjinë nga Tajlanda ishte importuar nga Holanda më 22.12.2024, në sasinë 24 kg. Nga kontrolli i gjurmueshmërisë rezultoi se subjekti nuk e kishte më në stok këtë produkt,” thuhet në njoftimin zyrtar të publikuar nga AKU.
Autoriteti ka përfunduar procedurën duke e raportuar rastin si njoftim zyrtar në sistemin evropian RASFF.
