Pas eliminimit të Real Madridit nga Arsenali në çerekfinalet e Champions League, shumëkush hodhi dyshime mbi të ardhmen e Carlo Ancelottit, por vetë tekniku italian i ka hedhur poshtë këto zëra, duke theksuar se marrëdhënia me presidentin Florentino Perez mbetet e pandryshuar.
“Nuk ka konflikt me klubin”
Në prag të ndeshjes së La Liga-s ndaj Athletic Bilbaos, Ancelotti theksoi:
“Kemi të njëjtën ide – nuk ka asnjë konflikt me klubin. Kushdo që thotë të kundërtën, thotë gënjeshtra. Presidenti tregon më shumë afeksion në këto momente sesa kur fitojmë.”
“Champions-i është historia e Madridit, por nuk është e vetmja gjë”
Edhe pse humbja 5-1 me rezultat të përgjithshëm ndaj Arsenalit ka qenë e dhimbshme, Ancelotti kërkoi të vlerësohet konteksti:
“Champions League është më e rëndësishmja për të gjithë dhe për historinë e Real Madridit. Por nuk është e vërtetë që pjesa tjetër nuk ka rëndësi.”
“Vetëm dua të falënderoj lojtarët”
Trajneri italian theksoi mbështetjen që ka marrë nga skuadra dhe klubi:
“E vetmja gjë që dua të bëj është të falënderoj lojtarët. Kam kaluar momente fantastike, kam fituar dy Champions me ta dhe dua të vazhdoj kështu. Kemi ende tituj për të luftuar, ndaj jemi të gjithë të fokusuar te kjo.”
E ardhmja? “Do të flasim në fund të sezonit”
Ancelotti ka kontratë me Real Madridin deri në vitin 2026, por nuk përjashtohet një ndryshim:
“Në fund të sezonit do të flasim për të ardhmen. Nuk kam asgjë për të thënë tani.”
Ai është përfolur edhe për stolin e Brazilit, pas shkarkimit të Dorival Junior, por tekniku 65-vjeçar e la gjithçka të hapur. Për momentin, fokusi mbetet te La Liga, finalja e Kupës së Mbretit më 26 prill ndaj Barcelonës, dhe pjesëmarrja në Botërorin e Klubeve në qershor në SHBA.
