Edhe pse është ende në garë për dy trofe këtë sezon, eliminimi i Real Madridit nga Arsenali në çerekfinalet e Champions League ka hapur një plagë të thellë brenda klubib madrilen. Në qendër të stuhisë që ka përfshirë “Los Blancos” është pikërisht Carlo Ancelotti, i cili konsiderohet si përgjegjësi kryesor për dështimin dhe eleminimin nga Champions League.
Dy konsiderohen si gabimet e mëdha që ka bërë Ancelotti këtë sezon. E para mungesa e besimit te lojtarët e rinj dhe aktivizimi i lojtarëve që e kanë mbyllur “ciklin”. Rasti konkreti, Lucas Vazquez vazhdon të marrë ende minuta, edhe pse niveli i tij këtë sezon ka qenë shumë i dobët dhe shpeshherë fajtor në humbjet që ka pësuar Reali. Nga ana tjetër lojtarët premutes si Endrick dhe Arda Guler, nuk iu është dhënë mundësia dhe minutazhi i nevojshëm që ata të shprehin kapacitetin e tyre të plotë.
Pra, mungesa e besimit tek lojtarët e rinj e ka penalizuar shumë Ancelotti-n këtë sezon. Gabimi i dytë lidhet me anën taktike. Me dëmtimin e Dani Ceballos, i cili ishte i vetmi që solli pak qartësi në mesfushë, ky repart lë shumë për të dëshiruar këtë sezon dhe është shumë i parashikueshëm për kundërshtarin. Mungesë vizioni në mesin e fushës, një lojë pa plan dhe mbi të gjithë mungesë furnizimi me topa për sulmin.
Kontrata e Ancelotti-t me Realin skadon në qershorin e vitit 2026, por të gjithë në Spanjë janë të bindur që italiani do të largohet në fund të sezonit aktual.
