Shqiptarët që jetojnë jashtë vendit kanë qenë të parët që kanë votuar për zgjedhjet parlamentare të 11 Majit. Më shumë se 250 mijë shtetas shqiptarë të regjistruar nga diaspora kanë marrë fletët e votimit me postë, ndërsa shumë prej tyre kanë ndarë momente në rrjetet sociale si Instagram, Facebook dhe TikTok, duke postuar video dhe foto teksa hapin zarfin e votës.
Ky trend është kthyer jo vetëm në një mënyrë për të dokumentuar pjesëmarrjen, por edhe në një thirrje për gjithë shqiptarët jashtë vendit që të ushtrojnë të drejtën e votës.
Ndërkohë, të enjten mbërritën në Shqipëri edhe votat e para të diasporës. 735 zarfa votimi janë vendosur në Parkun Olimpik në Tiranë, ku do të ruhen nën mbikëqyrje të rreptë sigurie deri më 11 maj, kur do të nisë numërimi paralelisht me votat e hedhura brenda territorit shqiptar.
Zarfi i parë i hapur i përkiste qarkut të Beratit dhe kishte ardhur nga Gjermania, ndërsa vota e dytë ishte për qarkun e Dibrës dhe vinte nga Franca.
Procesi i votimit nga diaspora shihet si një risi e rëndësishme në përfshirjen e qytetarëve në vendimmarrjen politike, pavarësisht vendndodhjes së tyre.
