Dita e sotme, pritet të ketë një rritje të vlerave barike, duke sjellë temperatura shumë të larta në të gjithë territorin e Shqipërisë.
Paraditja do të karakterizohet nga mot i kthjellët dhe vranësira të lehta kalimtare në zonat bregdetare dhe ato të ulëta. Ndërkohë, në zonat malore do të ketë kthjellime të ndërprera nga vranësira të shpeshta, të cilat mund të sjellin reshje të pakta dhe të izoluara shiu.
Gjatë pasdites, moti do të mbetet kryesisht i kthjellët përgjatë vijës bregdetare, ndërsa në pjesën tjetër të territorit do të mbizotërojnë vranësira dhe shira të pakta.
Temperaturat e ajrit do të pësojnë rritje të ndjeshme si në mëngjes, ashtu edhe në mesditë. Vlerat ditore pritet të variojnë nga 8°C në qytetin e Pukës, deri në 29°C në qarkun e Fierit, ku do të regjistrohet temperatura më e lartë.
Era do të fryjë mesatare në tokë, por në det do të jetë e fuqishme, me shpejtësi që pritet të arrijë deri në 60 km/h nga drejtimi jugor, duke shkaktuar dallgëzim deri në forcën 5 ballë në brigjet detare.
