Pas më shumë se dy muajsh në arrati kur u largua nga burgu i Shënkollit, policia ka arritur sonte të ripramgosë Daut Lazen.
Deri më tani në dispozicion kanë qenë një shumë prej 10 mijë eurosh për personat që ofrojnë informacion të vlefshëm.
Ai u arratis nga burgu duke shfrytëzuar momentin kur ishte në dhomën e trajtimit mjekësor, kur nuk ka pasur staf të burgut pranë tij dhe ka dalë jashtë në ajrim. Aty ka marrë një llamarinë dhe duke e mbështetur te muri mbi 4 metra i lartë, është ngjitur nëpërmjet llamarinës dhe ka kapërcyer murin dhe më pas ka kaluar edhe rrjetën rrethuese dhe është larguar me vrap në arat fushore pranë burgut të Shënkollit.
Prej 4 shkurtit ai ishte në kërkim.
Njoftimi i policisë:
Drejtoria Vendore e Policisë Tiranë
Kapet nga shërbimet e Komisariatit të Policisë Nr. 6, shtetasi Daut Laze, 49 vjeç, i cili u arratis nga Institucioni i Posaçëm Mjekësor në IEVP Lezhë, me datë 04 shkurt 2025.
Bazuar nga informacionet e marra nga inteligjenca policore, nga shërbimet e Komisariatit të Policisë Nr. 6, në Astir, u bë kapja e shtetasit të shpallur në kërkim Daut Laze, 49 vjeç, banues në Astir.
Ky shtetas, me datë 04 shkurt 2025, u arratis nga Institucioni i Posaçëm Mjekësor në IEVP Lezhë.
Veprimet e metejshme do të kryhen nga Drejtoria Vendore e Policisë Lezhë.
