Byroja Kombëtare e Hetimit ka realizuar një kontroll në një apartament në rezidencën “Kodra e Diellit”, që ndodhet mbi shtëpinë e kryebashkiakut të Tiranës, Erion Veliaj, i arrestuar muajt e fundit. Kontrolli raportohet se ka qenë pjesë e hetimeve të Prokurorisë së Posaçme kundër Korrupsionit dhe Krimit të Organizuar, që po zhvillohen për disa çështje, përfshirë dhe hetimin e dosjes së inceneratorëve.
Erion Veliaj u arrestua më 10 shkurt dhe është mbajtur në paraburgim që prej asaj dite, me kërkesë të Strukturës së Posaçme, për shkak të disa akuzave penale. SPAK e akuzon Veliajn, së bashku me gruan e tij, për krijimin e një skeme të organizuar të përfitimit të ryshfetit, me qëllim pasurimin e paligjshëm përmes disa organizatave jo fitimprurëse (OJF). Kjo ka sjellë përfitime të paktën 1.1 milionë euro në nëntë raste të ndryshme.
Përveç kësaj, Veliaj akuzohet se ka përfituar një vilë në Qerret, ndërkohë që bashkëshortja e tij, Xoxa, është akuzuar për shpenzime të shumta, rreth 890 mijë euro, në blerje veshjesh dhe bizhushesh online. Veliaj është lënë në masën “arrest me burg”, ndërsa Xoxa është caktuar me “detyrim paraqitje”. Për gjashtë biznesmenët që dyshohet se kanë bashkëpunuar me të, janë vendosur masa të tjera sigurie si “arrest shtëpie” dhe “detyrim paraqitje”.
