Arsenali ka marrë ndoshta rezultatin më të madh në historinë e stadiumit Emirates, duke mposhtur kampionët në fuqi të Europës, Real Madridin, me një performancë të jashtëzakonshme dhe një rezultat që i afron shumë me gjysmëfinalet e Champions League.
Dy goditje dënimi spektakolare nga Declan Rice dhe një gol i saktë nga Mikel Merino i dhanë ekipit të Mikel Artetës një fitore të madhe 3-0 në ndeshjen e parë çerekfinale ndaj Los Blancos, duke lënë ekipin e Carlo Ancelottit me detyrën e vështirë të përmbysë gjithçka në “Santiago Bernabéu”.
Ndeshja e ëndrrave për Rice
Që në fillim, Arsenali tregoi forcën: një top i rrezikshëm i Saka-s u devijua nga Rudiger mbi Camavinga dhe për pak sa nuk përfundoi në rrjetë. Në minutat në vazhdim, londinezët kishin një rast për penallti pas një prekje të dyshimtë me dorë nga Asencio, por VAR-i vendosi të mos akordojë 11-metërsh.
Real Madrid u përpoq të kundërpërgjigjej me Vinicius dhe Mbappé, por David Raya ishte gjithmonë në gatishmëri. Pas një pjesë të parë pa gola, gjithçka ndryshoi në pjesën e dytë.
Bukayo Saka u ndal në mënyrë të parregullt nga David Alaba, dhe nga goditja e lirë që pasoi, Declan Rice e dërgoi topin me mjeshtëri në cepin e portës së Courtois – një ekzekutim që ngriti në këmbë gjithë stadiumin.
Pas një vale rastesh të humbura, përsëri ishte Rice që shënoi golin e dytë me një tjetër goditje dënimi të jashtëzakonshme, duke konfirmuar statusin e tij si “cheat code” në këtë ndeshje.
Merino mbyll llogaritë, Camavinga ndëshkohet
Por Arsenali nuk u ndal këtu. I riu Myles Lewis-Skelly, me një asist brilant, shërbeu për Merino, i cili e shtyu topin në rrjetë për 3-0. Ndërkohë, mbrëmja për Realin u bë edhe më e errët kur Camavinga mori kartonin e dytë të verdhë në minutat shtesë, duke lënë ekipin me 10 lojtarë.
Me një epërsi të trefishtë, Arsenali shkon drejt “Bernabéut” me vetëbesim të lartë, ndërsa Real Madridit i duhet një tjetër mrekulli për të mbajtur gjallë ëndrrën europiane.
