Kapriçot e motit, me reshje dëbore dhe temperatura disa gradë nën zero në juglindje të vendit, kanë shkaktuar dëme të mëdha në sektorin e frutikulturës, sidomos tek pemët e kumbullës dhe qershisë.
Fermerët kërkojnë mbështetje nga shteti, pasi prodhimi është në rrezik të zhduket, ndërkohë që specialistët e bujqësisë pranojnë se kushtet e motit paraqesin një rrezik të madh për prodhimin e frutikulturave gjatë këtij sezoni.
Jorgo Braholli, fermer që ka mbjellë këto kultura, shpjegon se prodhimi i këtij viti është shkatërruar plotësisht. “Deri dje ishim në 80% të rrezikut, por me rënien e borës dhe temperaturat -7 gradë Celsius, sipas studimeve, kumbulla dhe qershia nuk mund të mbijetojnë. Kjo është 100%, nuk do të ketë kumbulla dhe qershi këtë vit. I bëj thirrje Ministrisë së Bujqësisë të shpallë gjendjen e alarmit në juglindje të vendit. Nuk ka fruta në juglindje,” thotë Braholli.
Specialisti i drejtorisë rajonale të ekstensionit bujqësor, Arben Hysolli, e konfirmon këtë situatë, duke theksuar se dëmtimet janë të mëdha. “Kulturat bërthamore janë më të rrezikuara për shkak të dëborës dhe ngricave. Në disa zona, temperaturat kanë arritur deri në -7 gradë Celsius. Ka një rrezik të madh për dëmtime të kultivave, dhe besohet se dëmtimi do të jetë serioz,” thotë Hysolli.
Fshatrat Dvoran dhe Kamenicë janë të njohura për prodhimin e frutikulturës, ndërsa pas 72 orësh pritet të bëhet një vlerësim i dëmeve të mundshme edhe tek pemët e mollëve.
