Hoteli i Cristiano Ronaldo në Marok është përfshirë nga flakët, ndërsa sipas raportimeve të deritanishme zjarri është vënë relativisht shpejt nën kontroll pa pasur nevojë të evakuohet hoteli.
Gjithashtu nuk raportohet për të lënduar.
Kompleksi hotelier “Pestana CR7” në Marrakesh të Marokut mori flakë të shtunën e kaluar (5 prill).
Sipas gazetës portugeze “A Bola”, flakët janë shuar nga ekipet e emergjencës të mobilizuara menjëherë në vendngjarje, ndërsa faqja e internetit “Marocco World News”, shton se “ishte një zjarr i vogël”.
I menjëhershëm ka pasur reagimi i stafit të hotelit, por edhe i shërbimeve të urgjencës, të cilat kanë ndikuar në shuarjen e shpejtë dhe të kujdesshme të zjarrit, duke parandaluar përhapjen e tij në pjesën tjetër të ambienteve.
Hoteli i Cristiano Ronaldos në Marrakesh është përdorur si strehë për turistët dhe banorët pas tërmetit që goditi Marokun në shtator të vitit 2023. Ai ka 168 dhoma, dy restorante, një palestër, një spa dhe një pishinë.
