Kryetari i arrestuar i Bashkisë së Tiranës, Erion Veliaj, që është i paraburgosur në Burgun e Durrësit, është regjistruar si votues i zgjedhjeve të 11 majit, si banor i Durrësit.
Veliaj, i cili ndodhet prej disa muajsh në qelinë e Durrësit, është shtuar në regjistrin e banorëve të qytetit bregdetar.
Nga një kontroll në listën e Komisionit Qendror të Zgjedhjeve për zgjedhjet parlamentare të datës 11 maj, rezulton se Erion Veliaj është përfshirë në listën e zgjedhësve të Durrësit. Kjo do të thotë se ai nuk mund të votojë për kandidatët e Partisë Socialiste në Tiranë, por vota e tij do të shkojë për kandidatët e Qarkut të Durrësit.
Veliaj u arrestua më 10 shkurt të këtij viti me urdhër të SPAK-ut, i akuzuar për korrupsion pasiv dhe pastrim parash.
