Në një fshat të Sidneit, Australia, ekipet e shpëtimit u përballën me një incident të pazakontë. Një grua u bllokua me kokë poshtë në një hendek të ngushtë ndërmjet dy shkëmbinjve. Ajo kishte rënë në këtë situatë gjatë një shëtitjeje me miqtë e saj në një zonë të pyllëzuar në Hunter Valley.
Incidenti ndodhi kur gruaja u përkul për të marrë telefonin e saj që i ra në gropë. Pas përkuljes, ajo përfundoi me kokën e saj të futur në ‘pykë’ midis dy shkëmbinjve të mëdhenj. Gjendja e saj ishte alarmante, duke lënë të dukeshin vetëm shputat e saj të këmbëve, sipas mediave të huaja shkruan Ilira News.
Miqtë e saj, të pafuqishëm për ta ndihmuar, thirrën ekipet e shpëtimit. Ekipet e shpëtimit u aktivizuan rreth orës 09:30 të mëngjesit dhe nisën një operacion kompleks për ta liruar. Ata punuan për shtatë orë, duke përfshirë policinë, mjekët e ndihmës së shpejtë dhe zjarrfikësit.
Për të krijuar një kalim të sigurt, ata hoqën disa gurë të mëdhenj. Një kornizë u ndërtua për të kryer një operacion delikat. “Me këmbët e saj tani të arritshme, ekipi duhej ta drejtonte atë përmes një kurbe të ngushtë për ta çliruar,” tha ekipi i shpëtimit në një postim në Facebook.
Një vinç u përdor për të lëvizur një shkëmb që peshonte 500 kg. Pas përpjekjeve të vazhdueshme, gruaja u lirua rreth orës 16:30. Për fat të mirë, ajo kishte vetëm gërvishtje dhe mavijosje të vogla nga incidenti.
