Pas më shumë se dy dekadash nga lufta në Kosovë, sot në Grabanicë dhe Jashanicë të Klinës janë rivarrosur mbetjet mortore të tetë viktimave të luftës që ishin në listën e personave të zhdukur. Ata u identifikuan së fundmi pas gjetjeve në varrezën masive në Bishtazhin të Gjakovës.
Pasi u mbajt ceremonia e rivarrimit, në Klinë u zhvillua një akademi përkujtimore, ku u nderuan sakrificat e martirëve dhe dhimbja e familjeve për të zhdukurit.
“Qeveria e Kosovës nuk do të ndalet kurrë së kërkuari përgjegjësi nga Serbia për krimet më të rënda të kryera gjatë luftës së fundit në Kosovë. Në këtë ditë të mbushur me dhimbje për vendin tonë, në emër të Kuvendit të Republikës së Kosovës, shprehim ngushëllimet dhe nderimet më të larta për sakrificën e të rënëve të kombit. Emrat e tyre do të mbeten gjithmonë në mendjen dhe zemrat tona, dhe do t’i kalojmë si mësim brezave të ardhshëm në Republikën tonë dhe kudo ku jetojnë shqiptarët”, tha Bogujevci.
Kryetari i Komisionit Qeveritar për Personat e Pagjetur, Andin Hoti, theksoi se 4 prilli nuk është thjesht një datë kalendarike, por një plagë e pashëruar edhe pas dy dekadash, dhe se nuk do të ndalen deri sa të zbardhet fati i çdo personi të zhdukur në Kosovë.
Kryetari i Shoqatës për Personat e Pagjetur në Klinë, Zeqir Morina, theksoi se rivarrimi i eshtrave të martirëve të zhdukur gjatë luftës është një dëshmi se liria nuk është dhuruar, por është arritur me shumë sakrifica.
